MATERI CARITA PONDOK SMP KELAS 8
Karangan anu tadi dibaca ku hidep téh disebut carpon. Carpon téh singgetan tina carita pondok, nyaéta karya sastra anu direka dina basa lancaran (prosa) kalawan ukuranana pondok. Ukuran pondok di dieu biasana dicirian ku jumlah kecapna ukur 5.000-7.000 karakter. mun diketik dina kertas A4 mah jumlahna antara 4-7 kaca. Ku lantaran pondok, carpon mah sok dimuat dina majalah atawa koran Tapi ukuran pondok di dieu mah rélatif, teu jadi ukuran anu tangtu.
Upama nilik eusina, jalan carita atawa galur carpon mah ilaharna sajalur, tara réa-réa tur teu pajurawet kawas novel. Kitu deui latar atawa sétting-na, éstu digambarkeun saeutik pisan, tara papanjangan Pon kitu deui palakuna, tara loba teuing.
Istilah carpon dina sastra Sunda, sarua hartina jeung short story dina sastra Inggris atawa cerpen dina sastra Indonésia. Mimiti sumebar dina sastra Sunda, basa aya carpon anu dimuat dina majalah Parahyangan, taun 1920. Dina taun 1930, medal buku kumpulan carpon munggaran, nu judulna Dogdog Pangréwong karya G.S.